بعد الحرب العالمية التانية ما خلصت.. جت أجهزة المخابرات اللى اشتركت فى الحرب.. وعلى رأسهم جهاز المخابرات السوفيتية.. وبدأ يراجع سجلات المخابرات الألمانية.. من بين الجواسيس اللى ملفاتهم اتراجعت.. واحد اسمه بويول غارسيا.. أو المعروف بالاسم الكودى.. غاربو.. المهم ظباط المخابرات السوفيتية وهما بيراجعو ملفه.. لقوه واحد من أبطال المخابرات الألمانية.. لدرجة انه اتكافئ من هتلر نفسه بوسام الصليب الحديدى.. الملف كان بيقول ان غاربو ده قدر فى وقصت قصير وحساس.. يكون شبكه تجسس فى قلب بريطانيا ويجند 27 عميل علشان يساعد المخابرات الألمانية فى الحرب العالمية التانية.. وكانت معلوماته من أهم المعلومات اللى بيعتمد عليها هتلر شخصيا فى تحركات الجيش الألمانى.. يعنى هتلر كان بيحرك الجيش بناء على معلومات الجاسوس ده.. هتلر لما كانت تجيله معلومه من أى جاسوس تانى.. كان يطلب تأكيدها الأول من غاربو.. للدرجة دى كان بيثق فيه.. وللدرجة دى كانت معلوماته قويه ومؤكده.. معلوماته كانت صح ميه فى الميه.. المهم ظباط المخابرات السوفيتية يعجبهم الكلام.. لكن ميدخلش دماغهم.. منين واحد من أهم الجواسيس؟.. ومعلوماته كلها مؤكده.. وزارعه فى قلب بريطانيا.. ومنين خسرت الحرب؟.. انت فعليا خسرت الحرب.. فمين الجاسوس اللى انت فرحانلى بيه أوى ده ومديله الصليب الحديدى.. مع كامل احترامى للمخابرات الألمانية وهتلر والرايخ التالت وفيلم الرعب ده.. إلا انى مش بالع الكلام ده..
