لا الجزائر ساوينه – اولا السودان
اشجانه سكتنه اوليش ؟؟ خيبتنه املونه ابألوان
بغداد اتريفت انقاض – لا خـدمات اولا عمران
اوزارات انباعت بآلوف – دويتوا اعلينه كالذبان
لملوم التمت ســــراق – بالدول امجادي بيبـان
موت اوذل اوتفجير- بعبع (داعش) بيد افلان
لا ضل حنطه اولا اسماك – (فدوه ايروحن) للجيران!
وسطاني اوصاير يعراق – بين امريكه اوبين ايران
للحرب اندگت لطبول – موت امكشر .. يا شبان
ولد الساسه متنعمين – (يالملحه) وليداتچ قربان
چم دوب اونحمل ليوين – لسكوت اوصاير عنوان
نـوح اولطم اولم ادموم – صارت مهنه من ازمان
(موصلنه) .. انربدت ع الروس – شالت (بصره) يم (طهران)
اسلاميه اوگالوا لحزاب – چـِذبوا اتباع الشيطان
بسمك يا دين (اتقشمرنه) – اوبسمك (يادين) الشعب انهان
وين الشاره! وين الحوبه؟غسل اوصاير للأذهان
سبحه اومحبس محتالين – منكم متبريه الأديان
(هـَفـت) اشبعنه كافي اوعود – احكومتنه اعتاويهه اسمان
يمته اتشبعون الله ايهدكم – لفلوس اترحلت للبلدان
جوعتونه اوصرنه ابعوز- منكم متبري الرحمان
يوم اگريب موش ابعيد – عامان اويلحگ شامان
لا المال الينفع .. لا جاه – بالحفره اوتاليكم جرذان
——————————
مايس / 2019
ســــــــــــــــتوكهولم