بمجرد دخول الجيش الأمريكى للعراق.. الرئيس مبارك اتصل بالرئيس الأمريكي جورج بوش الابن.. وبلغه بان القوات الأمريكية هيضرب عليها نار من سلاح مصرى.. حضرتك تقولى ايه ده.. ازاى كده؟.. هى مصر حاربت أمريكا فى العراق؟.. هحكيلك.. قبل غزو العراق للكويت بفترة قصيرة.. فوجئ نبيل فهمى وزير الخارجية المصري.. واللى كان وقتها لسه عضو البعثة المصرية فى الأمم المتحدة.. بعضو البعثة اليابانية فى الأمم المتحدة برده.. طالب يقابله.. وقتها نبيل فهمى كان مشغول بملف العراق والكويت.. خصوصا وان مصر طلبت منه ومن البعثة المصرية كلها انها تشتغل على الملف ده.. وتبعت تقييم لموقف البعثات الدبلوماسية الدولية عن نفس الموضوع.. فنبيل فهمى مكنش فاضى لمقابلة عضو البعثة اليابانية.. حاول يأجل مقابلته.. لكن الدبلوماسي اليابانى أصر انه لازم يقابله دلوقتى.. نبيل فهمى لسه هيبدأ فى الترحيب بيه كنوع من البروتوكول الدبلوماسي.. ففوجئ بالدبلوماسي اليابانى بيقاطعه وبيسأله سؤال واحد.. انتو تعرفوا ان صدام حسين هيغزو العراق خلال أيام؟.. فنبيل فهمى ولأنه فى النهاية بيمثل بلده اللى هى مصر.. مقدرش يقول أيوه نعرف أو منعرفش.. لأن كلمه زى دى هتتحسب على مصر بشكل رسمى مش على نبيل فهمى كشخص.. والأهم من كده ان نبيل فهمى ميعرفش معاد الغزو.. ومين اللى قال ان الموضوع وصل للغزو.. دى معلومة خطيرة جدا.. وايه علاقة اليابان بالموضوع أصلا.. ايه اللى جاب القلعة جنب البحر.. هقولك.. بعد استقلال الكويت عن الحماية البريطانية فى 19 يونيو 1961.. طلع الرئيس العراقي عبد الكريم قاسم فى مؤتمر صحفى بعدها بـ 6 أيام.. وأعلن انه هيضم الكويت للعراق باعتبارها تابعة للبصرة.. جزء من الأراضى العراقية يعنى.. فتقوم الجامعة العربية تقبل انضمام الكويت لعضويتها فى 20 يوليو من نفس السنة اللى هى سنة 1961.. بالبلدى كده بيقولوا للرئيس العراقى اللى انت بتعمله ده اسمه عيب.. مش بس كده.. دول بعتوا قوات لحماية الكويت.. القوات دى كانت من الجمهورية العربية المتحدة اللى هى مصر وسوريا بالإضافة لقوات من الأردن والسعودية والسودان.. وفضلت القوات العربية موجودة فى الكويت تحميها لحد ما الرئيس العراقى نفسه اتقتل يوم 8 – 2 – سنة 1963.. اتقتل ازاى؟.. فى انقلاب نفذه صدام حسين.. وبالمناسبة الرئيس صدام حسين كان واحد من اللى ضربوه بالنار.. وده وفقا لاعتراف الرئيس صدام حسين نفسه خلال محاكمته.. المهم دى قصه تانيه ممكن نبقى نحكيها لو حابين.. فلما مات عبد الكريم قاسم انتهت أزمة الكويت.. لأن عبد الكريم قاسم كان هو اللى عاوز يضم الكويت للعراق.. وبما انه خلاص مات فالموضوع خلاص انتهى.. أو الدول العربية ظنت ان الموضوع انتهى.. فعملت ايه؟.. سحبت القوات العربية اللى كانت بتحمى الكويت يوم 20 – 2 – سنة 63.. لكن يحصل اللى الدول العربية متوقعتوش.. وهو ان الرئيس صدام حسين نفسه يحاول يكرر نفس اللى عمله الرئيس عبد الكريم قاسم.. اللى هو أصلا اغتاله.. وحاول هو كمان يضم الكويت.. طيب ايه دخل اليابان فى الموضوع؟.. هقولك.. اليابان كان لها شركات وعمال كتير شغالين فى العراق.. شركات انشاءات.. فالعمال اليابانيين شافوا بعنيهم قوات عراقية كبيرة فى طريقها ناحية حدود الكويت.. ولاحظوا ان القوات العراقية مش مجرد قوات دفاعية.. لكن قوات هجومية.. حضرتك تقولى وازاى عمال انشاءات يفهموا الفرق بين القوات الدفاعية والهجومية.. أقولك لأن الدول الكبيرة لما بتخصص شركات علشان تبعتها تشتغل فى دول تانيه.. بتبعت بين العمال عناصر استخبارات.. ليه؟.. لأنها بتكون فرصة كويسه جدا لجمع معلومات عن البلد اللى الشركات دى هتشتغل فيها.. عناصر الاستخبارات بيدخلوا فى صورة عمال زيهم زى غيرهم من عمال الشركات.. وقد كان.. قدرت اليابان تعرف أسرع من الدول العربية.. ان صدام حسين خلاص بيحرك قواته علشان يغزو الكويت.. فالدبلوماسي اليابانى طلع جرى علي مين؟.. على بعثة مصر فى الأمم المتحدة.. طيب هى اليابان برده دخلها ايه اذا كانت العراق هتغزو الكويت من عدمه؟.. أقولك خايفه على مصالحها.. مش ليها شركات شغاله فى العراق؟.. والعراق دى داخله على حرب.. وبالتالى مصالح اليابان ممكن تتأثر.. فيهمهم يعرفوا اذا كانت العراق هتحارب ولا لأ.. كله بيدور على مصالحه.. فى الوقت ده كان الرئيس المصرى مبارك على تواصل مستمر مع الرئيس صدام حسين ودول الخليج.. مبارك وهو بيحكى الفترة دى.. قال ان كان واضح جدا وقتها ان العراق ناويه تغزو الكويت.. لكن كل ما أتصل على صدام حسين وأسأله يقولى مش هحارب.. فيطلع هو كمان – الرئيس مبارك يعنى – على دول الخليج يقولهم ان صدام قاله مش هحارب.. لكن تحصل المفاجأة يوم 2 أغسطس سنة 1990.. ويصحى العالم كله.. والعرب تحديدا على صوت الدبابات والطيارات وهى بتضرب الأراضى الكويتيه.. الغزو ابتدا.. طبعا كانت أول حاجه حصلت هى ان الإذاعة الكويتية بدأت تصرخ بجمله واحدة.. كويت العرب تستنجد بكم.. والله أكبر على المعتدى.. لكن استمر الجيش العراقى فى غزوه.. وخلال 48 ساعة بس.. كانت الكويت وقعت فى ايد العراق.. واتغير اسمها للمحافظة الـ 19.. مجرد محافظة من محافظات العراق يعنى.. طيب هى العراق غزت الكويت ليه أصلا.. صدام حسين وقتها قال ان الكويت بتسرق البترول العراقى.. بيروحوا ينقبوا على الحدود المشتركة بين العراق والكويت وبيسرقوا البترول العراقى.. ده غير ان الكويت أصلا كانت جزء من العراق فى القرن الـ 19.. وبالتالى احنا بنرجع الحق لأصحابه.. هو كان شايف كده..
