بعد ما قدرت قوات الحلفاء انها تنتصر على الجيش الألمانى فى شمال افريقيا.. قرر وينستون تشرشل رئيس الوزراء البريطانى.. فجأة كده من نفسه.. انه يطلع يخطب فى الناس.. هنا قيادات جيش الحلفاء قالوا تمام.. الراجل فرحان بالانتصار وعاوز يعنى يقول انا انتصرت وانا جامد وانا محصلتش.. ماشى.. اطلع يا عم قول اللى فى نفسك.. لكن تحصل المفاجأة امتى؟.. لما فى وسط كلامه يقوم قايل ان الهجوم الجاى.. هيكون على جزيرة صقلية.. اللى هى جنوب ايطاليا.. يخرب عقلك.. انت بتقول ايه؟.. انت مالك انت!.. مالك انت ومال الهجوم الجاى!.. كده الجيش الألمانى عرف خطة جيش الحلفاء وبالتالى الهجوم نفسه باظ قبل ما يبدأ.. وبعدين ده مكنش مجرد هجوم.. الهجوم على جزيرة صقليه.. لو نجح.. فده معناه ان الهجوم اللى بعده هيكون على ايطاليا.. علشان يوقعوا موسوليني.. وبالتالى تبقى الخطوة اللى بعدها هى تحرير فرنسا.. وبعدها دخول ألمانيا نفسها.. وبالتالى حضرتك كمشاهد جميل.. بتقدر تدرك ان مجرد كلمة واحده قالها تشرشل رئيس الوزراء البريطانى.. كانت هتبوظ الحرب كلها.. كانت هتساعد هتلر انه ينتصر فى الحرب اللى تقريبا كان بدأ يخسرها.. كانت هتضيع أرواح مئات الآلاف من جنود جيش الحلفاء اللى هيهاجموا جزيرة صقيلة.. لأن بكل بساطة.. الجيش الألمانى هيبقى قاعد مستنيهم هناك.. ما خلاص عرف ان الحلفاء هيهاجموا جزيرة صقلية.. فتمام.. لو راجل تعالالى الجزيرة.. أنا مستنيك فى الجزيرة.. ورا الشجرة.. هنا قادة جيش الحلفاء كانوا قاعدين مش عارفين يعملوا ايه؟.. هيعملوا ايه فى الخطة اللى باظت؟.. المهم من هنا لهنا.. خدوا قرار بإنهم يحولوا الهجوم من جزيرة صقلية لليونان.. مش ألمانيا هتستنانا فى صقلية ؟.. احنا بقى هنسيب صقلية خالص ونهاجم اليونان.. لكن هنا كان فى رأى تانى.. وهو ان هتلر أصلا.. ممكن يشك فى تصريح تشرشل.. يعنى ممكن يتخيل بإن تشرشل مغلطش ولا حاجه.. وانه قاصد يخدعه بالمعلومة دى ويبعته على صقلية.. علشان يغزو اليونان فعلا.. ما هو مفيش حد طبيعى يغلط ويضحى بمعلومة مهمه زى دى برده.. وهنا السؤال.. هنهاجم صقلية ولا اليونان ؟.. رجعوا لتشرشل.. يا فندم احنا بنفكر نغير الخطة ونهاجم اليونان.. فتشرشل قالهم مفيش الكلام ده.. هنهاجم صقليه يعنى هنهاجم صقليه.. طب بس الحكايه طب بس الموضوع.. مفيش فايده.. تشرشل مصمم على صقليه.. فما كان من قائد من قيادات الجيش البريطانى.. قالهم بقولكو ايه؟.. احنا مش عندنا جهاز مخابرات؟.. قالوله طبعا عندنا جهاز مخابرات.. قالهم بس.. هو يحل الموضوع.. أيوه يعنى هيعمل ايه جهاز المخابرات.. احنا نعمل المصيبه ونجرى ع المخابرات نقولها حليلنا مشاكلنا!.. لكن فى النهايه.. طلعوا فعلا على المخابرات البريطانية.. قالولها الوضع كذا كذا.. وكانت المفاجأة سيدى المواطن.. ان المخابرات البريطانية قالتلهم بسيطة.. الحل الوحيد علشان نهاجم صقليه.. هو إننا نأكد لهتلر إن إحساسه بإن تشرشل بيضحك عليه.. وبإن معلومة الهجوم على صقليه.. ما هى إلا خدعه من تشرشل علشان يهاجم اليونان.. أيوه كلام جميل.. لكن هنعمل كده ازاى؟.. اقتراحات كتير بقى بإننا نسرب المعلومة عن طريق جاسوس من جواسيسنا.. أو اننا نغامر أكتر بإننا نوقع جاسوس فى اديهم وخلال استجوابه يعترف بمعلومة مزيفه.. وهى ان بريطانيا فعلا ناويه تهاجم اليونان مش صقليه زى ما تشرشل قال.. لكن الاقتراح ده كان صعب وده لأن المخابرات البريطانية نفسها كانت عارفه ومتأكده ان المخابرات الألمانية.. تمتلك القدرة الكافية انها تطلع المعلومة الحقيقية من أى جاسوس.. مهما بلغت قدرته على المناورة والكذب.. وهنا يقترح ظابط مخابرات بريطاني فكرة لسه بتدرس فى مدارس المخابرات لحد النهاردة.. وهى انهم يوصلوا المعلومة عن طريق جاسوس تقبض عليه المخابرات الألمانية فعلا.. لكنه جاسوس ميت.. علشان ميخضعش لأى تحقيق.. وهنا سيدى المواطن.. مفيش ولا واحد من القيادات اللى قاعدين فى غرفة الاجتماعات نطق.. كلهم كانوا بيحاولوا يستوعبوا اللى الظابط ده قاله.. انت بتقول ايه يا ابنى !.. جاسوس ميت ايه اللى هيوصل المعلومة للألمان.. هنموتلك جاسوس يعنى علشان يوصل المعلومة؟.. فالظابط قالهم طبعا لأ.. احنا هنجيب جثة أى مواطن بريطاني.. حتى مش لازم يكون ظابط.. ندخل مشرحة أى مستشفى نختار جثة شاب صغير.. ونلبسه بدلة ظابط.. ونرميه فى مكان معين فى المحيط.. تكون قوة الرياح وسرعتها فى اللحظة دى.. كافيين انهم ياخدوا الجثة لحد شط دولة من الدولة الخاضعة للنفوذ الألمانى.. زى أسبانيا مثلا.. وساعتها هيفتكروه مات خلال محاولة توصيله للمعلومات دى.. وهيفتكروا ان المعلومات وقعت فى ايديهم بالصدفه.. وهنا بقى لازم نقف شويه.. فاكر لما شرحتلك فى حلقة جاسوسة الملابس الداخلية.. ازاى بتزرع جاسوس فى أى مكان علشان ميتكشفش؟.. قولتلك فى الحلقة دى ان من بين شروط زراعة الجاسوس ان يكونله أصل وفصل فى المكان اللى هيمارس فيه نشاطه التجسسي.. علشان لما دواير أمن الدولة المعادية تسأل مين ده؟.. يبقى معروف هو مين وجاى منين وبيعمل ايه؟.. وبالتالى ميثيرش الشكوك حوليه.. أهو الجاسوس الميت ده نفس القصة.. لازم برده يبقاله تاريخ.. هيستورى.. مين ده وبيشتغل ايه وكان جاى منين ورايح فين؟.. كل تفاصيل حياته لازم تبقى حقيقية.. أو حتى لو هتخترعها لازم تخترعها بشكل المخابرات الألمانية تصدقه.. وإلا الموضوع كله يبوظ وهتلر يكتشف ان المخابرات البريطانية بتضحك عليه..
