نفس الوجوه ادور كل هاي لسنين
اسود وجهم دوم وامطين ابطين
***
خلانه نحلم حيف وابحلم وردي
چذَّب علينه (الحيد) عادل المهدي
***
كلهه لحزاب اشرار باكت نفطنه
گعدتنه ع الرنگات ريفت وطنه
***
هذا الزمان اشلون شوغاته شوغات
جابلنه حفنه اشرار اتعس من المات
***
شوف القضاء اليوم يستر على الباگ
اگعد (حمرابي) اوشوف حتى النفس ضاگ
***
صوابچ كلف بغداد يا هو اليضمده
هذا الوكت هالراح والزمن عدَّه
***
غالي دمع بغداد يمحي اثرهم
روح اسأل التاريخ ماخلـَّه منهم
***
اهجس دمع بغداد يچوي بالضلوع
جاروْ عليهه اهواي والظلم موجوع
***
ما نابنه بغداد بس دمعة العين
الغصه بالبلعوم هالراحت اسنين
***
طشينه صرنه اغراب كلمن ابديره
التمت عليچ اجناب وانتِ اسيره
***
يوم او تهب بغداد كل احنه نعرف
تكنس زبل حكام والدهر يكرف
———————————
23/كانون الثاني/2019
ســـــــــــــــــتوكهولم
