نأمل ان تكون سنة 2020 سنة الانفراج على وطننا وسنة خير للجميع
لكم تحياتي
چم ثامراوچم عباس..مكي اومراد اوچم ياسين
چم ابن ثنوه اوچم علي اوطالب..اياد..حسوني اوچم حسين
چم باسم..مصطفى..زهراء..ساره چم تحسين
ولدك ياوطن ابكاتم اوبالساحات دمهم سال
شحسب شگول اشلون ! والعدد مامعدود يا لطيبين
***
جاي اسألك ليوين ينلف بالعلم شبان يا تشرين ؟
چم دوب نشعل بالشمع والدمع نيران ع الخدين
ســلطة غـدرســراق متســيـْده بـســم الديـن
تـذبـح بالشــباب..اوعَ الغـَـدر مـتـعـلمـيـن
لا ذمه..لاضمير..اوعلى كرسي الحكم متربعين
***
هم شفتوا گبل مجلس قضاء ايغطي ع السراق؟
اومدعي عام الشعب يتضامن اويه اللي يخون؟
اوبسم الشعب نواب على بوگ الوطن متحدين؟
اوســلطه تـبـوگ النفط والثـروات لجـل الجار؟
تـظلم بالشــعب والشــعب متعوب جوعانـيـن
***
وايـتام الوطن .. كـل يـوم بـيه اتـزيــد
بوگ اوخيانه اوغدر تســويف .. چـذابين
تهجير أميـَّه اومرض..هالحال من اسنين
حروب واذبح واذناب..ملتمه مدري امنين
على بيعـك يا وطن هاليوم متحزميـن
***
واگبور اشـكـثـر !! لا تنحســب لا تنعـد
وامك يا شــهـيـد اتـلوع .. وامطيـّـنه بالطين
يا دم الشــباب الســال .. چـَـن نهـران
احا يا وطن .. چمدوب .. ارد اسألك ليوين؟
هالراح الزمن .. طبينه (بالعشرين)-
ليوين يا كانون .. ليوين يا تشرين؟؟
————————————————-
كانون الثاني/2020
ســــــــــــتوكهولم
 |
|
