إيهاب كتلوه ابكربلاء : ميسون نعيم الرومي 

-(إيهاب) كتلوه ابكربلاء
-(مهند) گبله (فاهم) ..(علاء)-
والقائمه طالت يا (صفاء)
ذل اومهانه اودماء
لشوكت هذا البلاء
ليوين ؟
حرگوا الحنطه والشعير
دورالعـَماله حقير
للجار نبقه أسير
نشتغل عدهم أجير
لا تقدم عدنه لا بناء
امنين اجانه هالبلاء
امنين ؟
أميه اوتخلف بالبلاد
حـِرْفوا الدين الاوغاد
والقمع للشعب عاد
عشعش اوساد الفساد
للجاره عدهم ولاء
ليوين هذا البلاء
ليوين ؟
كتلت ولدنه (لحزاب)-
ذبحت اوخطفت بالشباب
جرح الغمگ ما طاب
والوطن صاير خراب
چم دوب نغسل دماء؟
اتجذر او عم البلاء
ليوين ؟
باگوا افلوس العراق
زرعوا شقاق اونفاق
الشعب ساكت يـُساق
واولاده دمهم مراق
وزعوا الموت ابسخاء
امنين جانه هالبلاء
عدنه آلوف الشهداء
ليوين كل هذا البلاء
ليوين؟؟
———————————
الشهيد إيهاب الوزني ناشط  مدني في كربلاء
اغتيل بكاتم يوم 9 / آيار/21 على يد قتلة الشعب
—————————-
الشهيد الناشط الطالب الجامعي مهند القيسي
اغتيل في يوم 10/شباط/2020 في كربلاء
على يد قتلة الشعب
————————————
الشهيد الناشط فاهم الطائي
 اغتيل في كربلاء يوم 8/12/2019
على يد قتلة الشعب
————————————–
الروائي الناشط الشهيد الدكتورعلاء مجذوب
اغتيل في 3/2/ 2019في كربلاء
على يد قتلة الشعب
—————————————–
صفاء السراي اغتيل في (28 أكتوبر2019) –
على يد قتلة الشعب .. ناشط حقوقي عراقي
لقب ابن ثنوة وأيقونة الإنتفاضة العراقية
—————————————————————-
10/ آيار /2021
ســــــــــــــــتوكهولم