تـِـبـْـقــَه صغـيـر : ميسون نعيم الرومي 

تبقه (صغـيـر) اوأبد ماتكـبـر
يابو (النستله) وافلوسك التكثر
تلطم ع (الحسين) ؟ وامتلتله الثروات
حتى اعله (الحسين) اتريد تتقشمر؟
الثار اعله الظلم والناده بالإصلاح
منكم بريء اومبتري ياجوگة القشمر
***
بعتوا العراق ابرخص واسرقتوا بالثروات
ذليتوا (الشعـب) والشعب ما يغـفـر
أطفال اتيتمت نسوان تبچي اتنوح
-(ارميتوا) بالشباب الدمهم اتطشر
اسجون امترسه والمنهم (الأحداث)-
صارت تجاره بالبشر، والأهل تتهجر
***
نصرف ع الدول والشعب كله ايلوع
جوع اوبطاله اومرض، يوميه هالتكثر
راح الوطن هالگعد ع الرنگات
احزاب امعدده، شغلتهه بس (تهـبـر)-
لا كهربه لا ماي لامشفه لاخدمات
تموز اللهب يشوي شوي، والناس تتجمر
***
بگـتوا بالنفـط والماي هم بعـتـوه
-(دجله اوفرات) النشف، والبلد يتصحر
هذا (العراق) اليزهي ابو الثروات
صايـر مزبله والشعـب (متخدر)-
راح الطاغيه، وافرحنه كلش حيل
جانه ابغفل البعمامته وابجبه يتستر
***
افلوسك تنسرق (اوليداتك) التشبع موت
حر اوقـَهـر، والكهربه بالعـَـمد تتفجر
شنهي اليحركك يا (شعب).. بسك ذل!
ضيم اومهانه اوعطش، والحاكم اتنمر
تلطم ع (الحسين) ؟ وامتلتله الثروات
يابو النستـله وافلوسـك التكثر
——————————————-
5 / تموز/ 2021
ســـــــــــــــــــتوكهولم