|
|
|||
احنه الطـَشَّـشنـَه الوكت
احنه التاهت مراسينه
احنه النموت ابسكته وبلا حس ..
والعشنه غرب ..
اوبين المگابر غرب .. والزمن ناسينه
احنه الاسمـْـنـَه بين الدول .. والمحـَّـد علينه سأل
تدري اشكثر عانينه ..؟
***
احنه الكتبنه ع الزمن .. قصص واسوالفنه الحزينه
نضحك بالچذب .. من حرگة البينه
احنه العشگنه النخل .. والوادي ويه الجبل
والهور ابگصْبـَه والبردي .. احنه الندري .. بس ما درينه !
احنه الحبينه السمه والگمر وانجومه
وابدمنه عاش الوطن واهمومه
اودجله اوفرات الغنه غناوينه
تدري اشكثرعانينه .. ؟
***
احنه انخلقنه ابوطن ماشاف راحه ابيوم
يحكـْمـَه رعاع اوصغار القوم
بي تنهش دول واتبوگ ثرواته
عايش ع الكفاف ! اشكثر عازاته !
امحسر يشعبه بالفگر والموت والينه
احنه الخطيه المانعرف خطايانه
تدري اشكثرعانينه .. ؟
***
احنه البـَـيـَّـن علينه الكبر
احنه الضاع من عدنه العمر
احنه الخلص بينه الصبر
احنه الغـِـدَرنـَه البحر
احنه البينه ضاگ السفر
احنه الماعدنه جوازات
احنه الوگفنه ع السفارات
احنه البلدنه باگته الجارات ..
واتسيد الجاهل والغبي والعارات
احنه الولدنه مساكين .. احنه الماعدنه عناوين
احنه العراقيين
احنه خطيه المانعرف خطايانه ..!
تدري اشكثرعانينه .. ؟
تدري اشكثرعانينه .. ؟
——————————
22 / كانون الثاني / 2022
ســـــــــــــتوكهولم
 |
|
